P1.3M gilungkab sa mga bata

CEBU, Philippines – Mokabat sa kapin usa ka milyon ka pesos nga kantidad sa mahalong alahas ug cash ang nadala sa mga kawatan nga misulod sa balay sa usa ka doktor diha sa Pleasant Homes Subdivision, barangay Punta Princesa ning dakbayan sa Sugbo nakalabay nga hapon.

Ang nabiktima sa pagpanglungkab nga nakahinabi sa Banat News apan nihangyong di magpahingalan mitug-an nga wala siya diha sa iyang balay atol sa pagkahitabo ug gisugo niya ang iyang katabang.

Sumala pa sa hepe sa Theft and Robbery Section (TRS) sa Cebu City Police Office, Chief Inspector David Señor adunay mga batan-on nga nasigpatang magdaladala og sako nga magsige og bahis-bahis sa lugar. Gani kining mga bataa gialarma na sa kapulisan sa Punta Princesa Police kaniadto tungod sa mga nanglabay nga kaso sa pagpanglungkab.

Ang doktora mibutyag nga pasado alas-2 sa hapon iyahang gitawgan ang iyang katabang aron ipakuha ang laboratory results sa iyang bana didto sa Punta Princesa. Apan sa pagbalik sa katabang sa ilang balay, gitawgan siya niini ug gipahibalo nga giransak na ilang balay.

Matud pa dihang misaka ang katabang sa taas nga bahin sa panimalay nagkatag na ang mga gamit sa kwarto.

Nakita usab sa pikas lawak nga giligwatan na ang iron grills sa bintana nga gituohang gigamitan og bara de kabra ug ang jalousy blades niini gikuha aron makasulod sa panimalay.

Nasayran usab nga ang vault sa biktima nalimtan niini og lock diin didto nabutang ang mga mahalon niining alahas, mga koleksiyon ug cash nga P350 mil nga ang tanan mokabat og P1.3 milyones.

Matud pa sa doktora way closed-circuit television camera ang subdivision ug kini miangkon  nga kompiyansa ra kaayo siya. Si David sa iyang bahin nagtuo nga adunay kaubang mga hamtong ang mga batang nangawat nga nagpangidaron lang og gibanabanang 8 anyos ngadto na sa 13 anyos. – /EIM) (BANAT NEWS)