Carillo di magpa-refund sa gasto sa Abella Clan

CEBU, Philippines - Ang mga sakop sa Abella Clan dili na modayon sa pagpangayo’g P112 mil gikan sa kagamhanan sa dakbayan sa Sugbo aron ihulip sa nagasto nila sa pagkaon atol sa ilang reunion niadtong Enero.

Si Konsehal Gerardo Carillo, lider sa pamilya’ng Abella, miingon nga gipahibalo na niya ang mga sakop sa ilang clan nga dili na sila modayon pagpangayo’g tabang pinansyal sa City Hall.

Kini tungod kay gisaway pag-ayo si Carillo sa iyang tinguha nga pabayran sa kagamhanan sa dakbayan ang nagasto sa pagpahigayon og panaghugpong sa pamilya’ng Abella.

Si kanhi kongresista Tomas R. Osmeña misaway ni Carillo kay giisip niya nga ang konsehal nakahimo og “conflict of interest” kay siya mipagahin og pundo nga gikan sa buhis sa katawhan alang sa grupo nga iyang gidumala.

Matud ni Carillo nga sukad pa kaniadto ang kagamhanan sa dakbayan kanunay’ng nagtabang sa pamilya’ng Abella kun magpahigayon sila og grand reunion.

Ang P112 mil nga para unta sa pagbayad sa pagkaon sa Abella Clan reunion apil sa gisukip sa Supplemental Budget No. 1 nga hangtud karon wala pa maaprobahi sa City Council.

Usa ka sakop sa Abella Clan nga si Ann Marie Palomo, konsehal sa Barangay Mambaling, miingon nga kapin lang sa 100 ka tawo ang mitambong sa ilang reunion sukwahi sa pangangkon ni Carillo nga ang kalihukan gitambongan sa mga 2,500 ka tawo.

Sa mga programa sa radyo, daghan ang mihatag og kumentaryo ug miingon nga dili g’yud tukma ang gihimo ni Carillo nga pagpagahin og kuwarta sa buhis sa katawhan alang sa private group.

Kini maoy hinungdan nga nasubo kaayo si Carillo ug mihukom nga dili na idayon ang iyang tinguha.  (BANAT NEWS)