APEC, IEC security personnel gibansay sa OCD-7
CEBU, Philippines - Nangandam na usab pagbalik ang kapolisan ug militar alang sa ikaduhang hugna sa umaabot nga Asia Pacific Economic Cooperation ug sa International Eucharistic Congress sa sunod tuig.
Mokabat 80 ka mga polis ug militar ang gipaubos sa training sa incident command system isip pagpangandam.
Matud pa ni Joy Hernandez, Training Officer sa Office of the Civil Defense, gipaubos nila ang 40 ka mga polis ug 40 ka mga sakop sa Armed Forces of the Philippines nga nakaagi na og basic seminar bahin niini.
Sila maoy gamiton alang sa seguridad sa APEC ug IEC 2016 kauban ang pipila ka mga ahensya sa gobiyerno aron pagsiguro sa kaluwasan sa mga delegado.
Sumala pa ni Hernandez, gipangandaman usab nila sa OCD ang mga posibleng katalagman nga motumaw dili lamang sa APEC ug IEC. Lakip sa ilang tun-an ang Basic Integrated Planning, Position Course ug All Hazard Incident Management Team Course.
Napulo ka kinamaayohang partisipante ang kuhaon aron himuong training instructor sa umaabot nga adlaw aron ilang ipasa ilang nahibaw-an ngadto sa ilang mga kauban.
Ang maong seminar gisugdan niadto pang Septiyembre 21 ug matapos karong adlawa sa usa sa mga hotel sa dakbayan sa Sugbo. (BANAT NEWS)
- Latest
