JVR gisumbalik ni Villarante

CEBU, Philippines - Gisumbalik ni Bise Mayor Romeo Villarante sa pagbasol si Talisay City Mayor Johnny V. delos Reyes (JVR) nga wala’y kabangkaagan ug dili makamao sa pagpadagan sa siyudad.

Kini human gibasol na usab ni JVR ang konseho sa paghuot sa trapiko sa dakbayan.

Matud ni Villarante nga diha’ng siya ang nagdumala sa City of Talisay-Traffic Operation Development Authority (CT-TODA), 50 ra kabuok ang traffic enforcers apan sa diha’ng gikuha sa mayor ang pagdumala niini, niabot na og dul-an sa 100 ka enforcers.

Sa niagi’ng 888 News Forum sa Marco Polo Plaza, si JVR nipahibawo nga P352 milyones ang gigahin sa Department of Public Works and Highways sa pagtukod og diversion roads sa Talisay aron dili na maghuot ang mga sakyanan sa Tabunok.

Una’ng gibasol ni JVR ang konseho sa kapakyas sa pagtukod sa bag-ong merkado sa Tabunok gumikan sa ila’ng pagbabag nga makautang ang siyudad.

Matud ni JVR nga nindot unta ang desinyo sa merkado nga adunay tulo ka andana diin aduna sab kini’y parkingan sa mga traysikol ug mga sakyanan sa taas nga bahin.

Sugyot ni Villarante nga ipaubos sa public-private partnership aron dili mabug-atan sa galastuhan ang syudad ug magamit ang pundo sa ubang maayo’ng serbisyo sa katawhan.

Natingala usab si Villarante kun ngano’ng gusto gyud nga mangutang ang mayor og bulto nga daku’ng kantidad sa kwarta.

Ang konseho dili na makatugot nga sige na lang sila ang pasanginlan sa mayor sa matag giatubang niini’ng mga isyu sa dakbayan hinungdan sa tubag ni Villarante. (BANAT NEWS)