P300T shabu, marijuana nasakmit

CEBU, Philippines - Bag-o’ng gawas sa prisohan nga gitumbok nga level 2 drug pusher sa dakbayan sa Danao ang nasikop na usab sa gihimo’ng buy-bust operation sa Provincial Intelligence Branch ug Provincial Anti-Illegal Drugs Special Operations Task Group pasado alas 9 kagahapon sa buntag.

Ang nasikop mao si Malvin Mangas Sr., 41, taga Juan Luna St., Looc, dakbayan sa Danao.

Matud ni Senior Inspector Armando Labora sa PIB nga si Mangas una na’ng gidakop sa Philippine Drug Enforcement Agency sa kaso sa illegal drugs ug gibuhian sa Danao City Jail human matud pa na-dismiss ang kaso.

Nasikop usab sa kapolisan ang live-in partner nga si Hennie Barrega ug laing unom nga sila si Reynaldo Montebon, Darwin Galo, Marwin Gomez, Raul Siscon, Nazareno Lao ug Jonas Mangas nga naaktohan nga nagsuyop sulod mismo sa panimalay ni Malvin.

Gihulagway ni Labora ang panimalay ni Mangas nga gihimo sab nga drug den ug daghang silingan ang nangreklamo gumikan kay 24-oras nga saba tungod sa mga tawo nga moadto sa dapit.

Nagtuo ang kapolisan nga human nakagawas sa prisohan si Mangas nibalik na usab kini sa pamaligya og drugas ug base sa gipamahayag niini giingong gikan sa Liloan ang drugas nga gibaligya.

Nakuha gikan sa mga dinakpan ang 26-gramos nga gituohang shabu nga nagkantidad og P300 mil, drug paraphernalia ug P500 nga buy-bust money.

Samtang nadakpan sa mga guwardiya sa pantalan sa lungsod sa Samboan ang 31-anyos nga lalaki nga nagdala og mga binandol nga dahon sa marijuana sulod sa backpack pasado alas 6 sa nakalabay nga hapon.

Si Christopher Cuenca, lumad nga taga dakbayan sa Dipolog, Zamboanga del Norte, nadakpan sa mga guwardiya sa Lite Shipping Company.

Matud ni Senior Police Officer 1 Bethoven Rocamora, chief investigator sa Samboan Police Station, nga tanang pasahero sa mao’ng barko ang moagi gyud sa pagrekisa una pa makasakay sa barko.

Pasado alas 6 sa hapon diha’ng paingon na unta nga mosakay sa barko ang suspek, nakita sulod sa iya’ng balonan ang mga gidudahang pinauga nga dahon sa marijuana ug ang uban giputos og packing tape sulod sa bag.

Human niini gi-imbitar sa mga guwardiya si Cuenca sa buhatan sa manager sa pantalan kinsa mao na sab ang nitawag og pakitabang sa kapolisan.

Ang dinakpan nitug-an sa kapolisan nga gikan siya nakigtagbo sa iya’ng higala sa dalan Colon, dakbayan sa Sugbo kay naghatud kini sa manok igtatari gikan sa Dapitan. Apan ang iya’ng higala nga taga Dapitan ang nitawag kaniya ug niingon nga duna kini kuhaon nga pinauga nga dahon nga iya sab nga dalhon kung mouli balik sa Dapitan.

Si Rocamora niingon nga si Cuenca mao’y labing  una nga pasahero nga nadakpan sa guwardiya sa pantalan nga suway nga nipalusot og marijuana.

Nihangyo na sab karon ang kapolisan sa mao’ng lungsod nga pabutangan og x-ray machine ang pantalan aron mas dali nga mabantayan ang mga pasahero nga magpalusot og drugas ingon man mga armas paingon sa Mindanao. (BANAT NEWS)