One Citilink Terminal gibuksan na pagbalik

CEBU, Philippines - Gipabuksan pagbalik sa hukmanan ang One Citilink Terminal nga gipasirad-an ni Mayor Michael Rama sa miaging Hulyo, apan ang mga abogado sa dakbayan mohimo og lakang legal aron supakon ang kamandoan sa korte.

Si Regional Trial Court (RTC) Judge Generosa Labra misalikway usab sa awhag sa City Hall nga siya mo-inhibit sa paghusay sa kaso nga naglambigit sa One Citilink Terminal.

Nakumbinser ang huwes sa argumento sa mga abogado ni Felipe Codera Barrientos Jr., ang tagdumala sa terminal, nga apektado ang daghang sumasakay ug mga drayber sa van for hires tungod sa pagsirado sa terminal.

Human sa pagpatak-op sa terminal, ang tagdumala sa terminal mipasaka og kaso’ng civil batok sa mayor, ug sa City Hall clearing team ug nagpugong sa pagpadayon pagsirado sa terminal.

Ang baruganan ni Barrientos pinaagi sa iyang abogado nga si Ralph Sevilla nga kalapasan sa balaod ang gihimo sa dakbayan nga pagsirado sa terminal.

Ang terminal gitukod tungod kay ang siyudad adunay ordinansa nga ang mga PUJ ug ubang public utility vehicles nga nagpanawan gawas sa dakbayan, anha ra g’yud kutob sa mga accredited terminal.

Matud sa mga opisyal sa City Hall nga wala nay business permit ang terminal mao nga ila kini nga gipasirad-an. Matud ni Barrientos nga wala g’yud sila mopalta pagbayad sa ilang obligasyon sa City Hall apan wala na kini modawat sa ilang gibayad.

Ang husay sa kaso magpadayon bisan pa man og gipabuksan na pagbalik ang terminal. Matud ni Barrientos nga ang mga van for hires makahimo na pagbalik sa terminal. (BANAT NEWS)