Dugang taxi units patun-an
CEBU, Philippines – Giawhag sa hunta probinsiyal sa Sugbo ang Department of Transportation and Communications (DOTC) sa pagpahigayun og lawom nga pagtuon ug mangonsulta sa publiko kabahin sa sugyot sa Land Transportation Franchising and Regulatory Board (LTFRB) nga magdugang og 2,500 ka taxi units.
Si Bokal Arleigh Sitoy sa iya’ng resolusyon nagkanayon nga ang kahuot sa trapiko sa kadalanan ang daku’ng problema nga giatubang karon sa Sugbo.
Ang mga lokal nga kagamhanan lakip na ang pribado’ng organisasyon nihimo na og lakang aron masulbad ang problema tungod kay ang kahuot sa trapiko nakaapekto kini sa ekonomiya.
Matud ni Sitoy nga ang pagdugang og mga sakyanan dili makatabang sa pagsulbad sa kahuot sa trapiko sa probinsiya.
Kini ang hinungdan sa awhag sa hunta probinsiyal ngadto sa DOTC. Subay niini, si Bise Gobernador Agnes Magpale nagkanayon nga kinahanglan gyud unang tun-an ang sugyot tungod kay posible’ng dili lang unya ang Metro Cebu ang mosamot ang kahuot ang trapiko apan lakip na unya ang ubang bahin sa Sugbo.
Ang sugyot sa LTFRB subay usab sa hangyo sa mga tagdumala sa hotels ug malls sa Sugbo.
Giingong kuwang ang mga taxi sa mga malls ug hotels ilabi na sa peak hours.
Niini’ng ulahi lang ang LTFRB nagkanayon nga iduso nila ngadto sa kauluhan ang kabahin sa pagdugang og mga taxi units ug ang DOTC ang modesisyon kung tugutan ba ang maong hangyo. – /GMR) (BANAT NEWS)
- Latest
