Peke nga business permits nasakmit
CEBU, Philippines – Dugang tulo ka peke nga business permits ang nasakmit sa taga Tax Mapping Division kagahapon atol sa gipahigayong monitoring sa North District sa dakbayan sa Sugbo.
Matud ni Andy Borres, hepe sa Mayor’s Business Permit Division, nga giila ang usa ka John Paul Reyes kinsa magpaila nga kawani sa City Hall ug motanyag nga mao’y molukat sa permit ug personal nga mangolekta og bayad gikan sa mga business establishments.
Dugang ni Borres nga dili lang kini ang una’ng higayon nga daghan og reklamo nga nadawat ang iyang buhatan kalabot ni Reyes tungod kay sulod lang karong tuiga, 10 na ka business establishments ang nakakuha og permit nga peke.
Tug-an pa ni Borres nga gawas sa peke nga business permit, may mga peke sab nga sanitary permit ang na-issue ni Reyes.
Nasuta usab ni Borres nga duha na katuig kini nga gibuhat ni Reyes ang pagpangilad og mga business owners sa dakbayan.
Gipasabot ni Borres ang publiko nga dili mosalig og tawo nga mokalit lang og duol nila ug magpaila nga kawani sa City Hall tungod kay ang pagkuha sa business permit personal kini nga kuhaon sa City Treasurer’s Office.
Buot pasakaan og kaso nga estafa si Reyes kun makit-an kini sa mga awtoridad tungod kay ubay-ubay na sab ka mga negosyante ang nailad niini. – /GMR) (BANAT NEWS)
- Latest
