Wanted nakigpinusilay patay

CEBU, Philippines – Patay ang ikapito sa mga most wanted nga kriminal sa dakbayan sa Talisay dihang matud pa nakigpinusilay kini sa mga sakop sa Provincial Intelligence Branch (PIB) ug Talisay City Police kagahapon sa hapon diha kilid sa Talisay City Fishport sa sitio Salvador, barangay Tanke.

Ang namatay mao si Ritchie Daan, nagpuyo sa nahisgutang lugar nga gihulagway nga badlungon sa maong dapit ug gipasanginlang nalambigit sa mga pagpatay, pagpanulis ug ilegal nga drugas.

Nadakpan usab dayon ang iyang kauban nga si Arnel Tabar, 29 anyos kinsa unang nagpaila nga siya si “Rex Alondo.”

Si Inspector Windell Abellana, deputy chief sa Talisay City Police nibutyag sa Banat News nga si Daan ang aduna'y ka transaksyon diha sa maong lugar ug naabot ang impormasyon diha kanila.

Tungod niini ilang gitawgan ang PIB pinangulohan ni SPO2 Reynaldo Solante  aron magpa-backup pagsusi sa dapit apan sa pag-abot sa mga polis gikatahong mibunot kini og armas apan naunhan pagpusil sa mga polis gamit ang M4 Rifle.

Naigo sa tuo nga bukton ug dughan si Daan kinsa gikatahong nagsuot og bullet proof apan wa matino nganong wala kini makapakgang sa mga bala, patay na siya pag-abot sa Talisay City District Hospital.

Nakuha gikan sa mga suspetsado ang .45 nga pusil, KG-9 submachine pistol, granada, relo, ug daghang mga bala ug bag niini nga gisudlan sa iyang mga butang.

Samtang ang kauban ni Daan nga nasikop nitug-an nga wa siya'y labot sa hitabo kay igo lang siyang miduaw sa amigo niyang gwardya sa Talisay City Fishport.

Si Abellana miingon nga si Daan maoy usa sa lider sa ilang grupo sa mga guns for hire sa maong dapit.

Apan ang inahan ni Daan nga si Vilma kusganong mihimakak sa pasangil ngadto sa iyang anak kay inosente kini. – /EIM) (BANAT NEWS)