P2.1M shabu nakuha sa Duljo

CEBU, Philippines – Mokabat sa 2.1 ka milyon ka pesos nga kantidad sa mga gituohang shabu ang nasakmit sa mga sakop sa City Intelligence Branch (CIB) sa Cebu City Police Office ug tulo ka mga tawo ang ilang nadakpan atol sa laing drug raid sa kapulisan diha sa Sitio Sto. Niño, barangay Duljo-Fatima ning dakbayan sa nakalabay nga gabii.

Gawas sa nasakmit nga drugas, nasakmit usab sa kapulisan ang upat ka mga armas nga naglakip sa duha ka .45 caliber pistols ug duha ka .9mm pistols nga duna’y mga bala ug usa ka .22 Black Widow Magnum.

Ang mga nadakpan mao sila si Christopher Dob, 31, Criesdel Hugo, 38 ug Junrel Tradio, 26, apan ang target nga si Mart Diez  nakabantay ug nakasibat.

Matud pa sa hepe sa CIB, Supt. Romeo Santander nga si Diez mao’y usa sa sinaligan ni Jeffrey Diaz alyas Jaguar sa negosyo niini sa ilegal nga drugas.

Ang compound ni Jaguar sa mao gihapong barangay gironda niadtong Domingo sa kaadlawon apan nakaipsot kini hasta iyang mga kaliwat nga subject sa search warrant.

Nakuhaan hinuon ang compound og mga armas, bala ug P4milyones nga shabu.

Ang operasyon sa miaging gabii pinasikad gihapon sa search warrant nga gi-isyu ni RTC Judge Soliver Peras.

Ang mga nadakpang tulo ka mga lalaki nga na-aktuhan nga nag-repack og drugas, apan nihimakak ang tulo kay matud nila panday sila ni Diez pagtrabaho sa balay niini.

Nakuha sa kapulisan gikan sa tulo ang usa ka dakung putos, 15 ka medium size ug 235 ka mga gagmay nga pakete sa gituohang shabu nga mikantidad og P2.1 milyones ug cash nga P5 mil gituohang halin sa drugas ug digital weighing scale.

Si Santander miingon nga sumpay ang maong operasyon sa pagronda nila sa compound ni Jaguar kinsa gitumbok nga dakong druglord sa dakbayan sa Sugbo.

Samtang ang Mambaling Police Station misikop sa usa ka 33 anyos nga si Felix Emeterio diha sa sitio Villa Kalubihan, barangay Basak San Nicolas human kini napalitan og usa ka paketeng shabu sa mga polis.

Nasakmit gikan kaniya ang duha ka medium size packs nga shabu nga mitimbang og 10 gramos nga mikantidad og P116 mil.

Sa laing bahin, adunay himuong lawom nga case review ang nagkadaiyang buhatan sa kapulisan aron hisgutan ang giingong pag-leak sa impormasyon bahin sa pagronda sa kapulisan sa balay ni Jaguar.

Si Sr. Supt. Rey Lyndon Lawas ang hepe sa directorial staff sa Police Regional Office-7 makigkita sa mga opisyal sa City Intelligence Branch ug Regional Intelligence Branch aron tukion ang problema.

Kahinumdoman nga atol sa paghamag sa mga polis sa compound ni Jaguar diin adunay dose ka panimalay, nag-andar pa ang pipila ka mga appliances sulod sa balay ug duna pa’y pagkaon nga nabilin timailhan nga bag-o pa lang nakasibat ang mga tawo.

Apan aminado si Lawas nga daghang posibleng hinungdan kung asa maggikan ang leak sa impormasyon, pwedeng gikan sa korte sa pagkuha pa lang sa search warrant, paghimo sa surveillance, ug posible usab nga gikan sa badlungon nga mga polis.

“So it’s just a matter of which are the better the police or the criminals, but sooner we will catch them”, matud pa ni Lawas. – /EIM) (BANAT NEWS)