Poe nag-una sa survey, sunod si Roxas

CEBU, Philippines – Padayong nanguna si Senador Grace Poe nga gusto sa mga Pilipino nga mahimong sunod nga presidente o sunod nga bise presidente alang sa umaabot nga eleksyon sa sunod tuig.

Sumala pa sa report sa Interaksyon.com, sa maong survey nga gihimo sa Social Weather Station, ikaduhang kang Poe si Mar Roxas nga nalabwan na karon si Vice President Jejomar Binay.

Ang survey results nagpakita nga si Poe nakakuha og 47 percent gikan sa kaniadto 42 percent niadtong nakalabay nga bulan sa Hunyo.

Samtang si Roxas, kinsa maoy giendorsar ni Presidente Benigno Aquino III nilayat ngadto sa 39 percent gikan sa 21 percent sa kataposang survey niadtong ikaduhang kwarter ning tuiga. Samtang gibiyaan na si Binay kinsa nakakuha lang og uno porsiyentong abante gikan sa 34 percent niyang nakuha niadtong Hunyo nga SWS survey.

Mitibugsok usab ang rating ni Davao City Mayor Rodrigo Duterte gikan sa 20 percent nahimo na lang karong 16 percent. Gituohan nga ang pag-anunsyo niya nga di na siya mokandidato maoy nakaingon niini.

Ang survey nga gihimo sa SWS penetsahan og September 2 hangtud 5 diin 1,200 ka tawo sa tibuok nasud nga gipangutana kun papilion sila og tulo ka tawo nga labing haom aron mopuli kang PNoy. (Gikan sa Wires/EIM)