“Shoplifter” nadakpan nanguha’g mga plato

CEBU, Philippines –  Gibilanggo karon ang usa ka babaye nga matud pa nasakpan nga nangawat og kapin 20 ka plato ug usa ka box keeper gikan sa usa ka mall sa dalan Colon kaniadtong Domingo sa hapon.

Si Joan Yugot, 27, taga Sitio Private, Urgelio Street sa Barangay Sambag II, dali nga gi-turn-over sa mga house detectives ngadto sa Waterfront Police Station.

Nasakpan si Yugot nga nanguha og mahalon nga klase sa plato gikan sa Gaisano Main ug matud pa mogawas na unta nga wala bayari ang iyang gikuha.

Matud ni PO2 Tito Giba sa Waterfront Police Station nga nasakpan sa house detective si Yugot nga gipangsulod sa iyang travelling bag ang sobra 20 ka plato ug box keeper, dayon migawas na unta kini sa mall.

Ang mga naniid nga house detectives mipugong ni Yugot diha nga mogawas na unta gikan sa tindahan ug nakuha gikan kaniya ang mga gipangawat nga baligya.

Mokabat ngadto sa P11,232 ang kantidad sa mga branded nga plato nga kawaton unta ni Yugot.

Matud ni PO2 Giba nga ang suspek mitug-an kanila nga iya unta nga ibaligya ang mga plato tungod kay wala g’yud siya’y trabaho. – /RUB) (BANAT NEWS)