Tawo nga natulog gawas sa balay gipatay
CEBU, Philippines – Usa ka tawo nga gidudahang kawatan giluba sa wala mailhi nga mamumuno didto sa Sitio Mananga 2, Barangay Tabunok, Talisay kagahapon sa kadlawon.
Ang biktima giila nga si Anwar Guinal, 35, ulitawo, nagpuyo sa nahisgutang lugar. Nakaangkon si Guinal og daghang samad sa dunggab sa nagkadaiya nga parti sa iyang lawas.
Base sa report sa kapolisan, nasuta nga natulog ang biktima gawas nga bahin sa iyang panimay diha nga gihansakan og kutsilyo sa mamumuno.
Matud sa mga pulis nga nabatian na lang sa mga silingan nga nag-agulo ang biktima. Ang samaran nga biktima gidali unta pagdala sa ospital apan gideklarar nga patay na.
Ang kapolisan miingon nga daghan ang mitug-an nga nakadawat sila og report nga nalambigit sa pagpangawat ang biktima ug gani hasta ang ilang grupo sa mga Muslim nga nagpuyo sa Talisay mikunpirmar sa report.
Naghimo pa ang mga polis og imbestigasyon aron pag-ila sa kriminal. – /RUB) (BANAT NEWS)
- Latest
