Druglord protektado?

CEBU, Philippines – Ang director sa Police Regional Office-7 miklaro nga walay drug lord sila nga giproteksyonan.

Kini maoy pagklaro ni Chief Superintendent Prudencio Tom Bañas kalabot sa mga pagdudang nigawas nga protektado ang gipasanginlang notadong ‘druglord’ sa barangay Duljo-Fatima sa dakbayan sa Sugbo nga nakaipsot atol sa pagpangronda niadtong Domingo sa kaadlawon.

Ang gironda mao ang compound ni Jeffey “Jaguar” Diaz nga adunay dose ka mga dagkong panimalay apan bisan usa sa mga subject sa search warrant nga giisyu ni RTC Judge Soliver Peras way nadakpan. Sagad sa mga naa sa search warrant mao iyang mga ig-agaw, mga uyoan ug uban pang kabanay nga giingong pulos nagpadagan og negosyo sa ilegal nga drugas.

Matud pa ni Bañas nga bisan walay naposasan sa pagronda sa “Diaz Compound” dili kini makapahuyang sa ilang tinguha nga buntogon ang problema sa drugas dinhi sa lalawigan.

“Gusto ko lang ipaabot sa inyo na walang may hawak na drug lord sa amin. And I can say that in front of all of you,” matud ni Bañas.

Dugang  pa niya nga kung aduna may nahibaw-an ang publiko nga pulis nga nalambigit sa illegal nga drugas, siya na mismo ang modakop niining mga badlungon sa kapulisan.

Matud pa ni Bañas kutob nga naa pa siya magserbisyo sa rehiyon dili siya mohunong sa kampanya batok sa illegal drugs.

Niadtong adlaw nga Domingo, gironda sa hiniusang pwersa sa kapolisan ug sa Philippine Drug Enforcement Agency-7 ang maong lugar.

Apan way naabtang tawo ang kapolisan, bisan ang mga mahalong mga sakyanan ni Diaz ug sa iyang mga kabanay lakip na ilang mga appliances ug mga gamit sa panimalay nahawan na. Sud sa compound adunay pribadong basketball court, firing range ug kapilya. Mokabat ngadto sa P4 milyones nga kantidad sa gidudahang shabu ang nasakmit sa kapolisan  apil na mga armas ug bala.

Tungod niini, si Bañas mimando sa mga intelligence operatives sa PRO-7 pagbuhat og imbestigasyon aron pangitaon kun kinsa ang nihatag og impormasyon ngadto sa mga target nga rondahon.

Wa isalikway ni Bañas nga posibleng mga polis ang nihatag sa impormasyon ug gimando niya ang pagpangita niini.

“Malalamin din iyan in due time kung sino ang nagbigay ng impormasyon. Hayaan niyo, darating rin ang araw, makukuha rin yan,” matud pa ni Bañas. – /EIM) (BANAT NEWS)