Tawo nga armado gidakop sa kapolisan

CEBU, Philippines – Tawo nga armado ug gituohan nga adunay patyon nadakpan sa kapolisan didto sa Barangay Casili, Consolacion, ug nasakmitan og .38 kalibre nga revolver nga kompleto sa mga bala. Si Meljun Gonzaga Pepito, 27-anyos, minyo wala dayon makapakita og lisensya sa armas nga nakuha gikan kaniya mao nga gidakop siya sa mga polis.

Matud ni PO1 Socrates Borinaga sa Consolacion Police Station nga usa ka nagpakabana nga lumolupyo sa maong dapit ang nagpahibalo kanila kabahin sa armado nga lalaki nga nagpaatbang sa usa ka panimalay.

Ang tawo nga mi-report sa kapolisan natahap nga si Pepito adunay dautang plano ug nagpaabot kini nga adunay mogawas sa panimalay nga gipaat’bangan niini maoy hinungdan nga mi-report sila sa kapolisan.

Si PO1 Borinaga miingon nga ang mga sakop sa intelligence section sa Consolacion Police Station maoy nakatubag sa maong alarma ug naabtan gayud ang maong lalaki ug nasakmitan nila sa mao nga armas.

Wala makatug-an si Pepito ngano nga nagdala siya’g armas ug nagbarug-barog atubangan sa usa ka panimalay kapin na sa duha ka oras.

Giandam na sa kapolisan ang kaso nga illegal possession of firearms aron ipasaka batok ni Pepito sa hukmanan. – /RUB) (BANAT NEWS)