Baratohon nga ceiling fan nakaingon sa sunog

CEBU, Philippines – Gipanghatagan na og pagkaon ang mga 50 ka pamilya nga biktima sa sunog sa Sitio Lapyahan, Labogon, Mandaue kaniadtong Biyernes sa gabii.

Ang mga nasunogan anaa lang temporaryo nga gipahimutang sa mga tulda sa dapit nga nahimutangan sa nasunog nila nga panimalay.

Ang kagamhanan sa Mandaue nag-andam pa sa ubang mga hinabang nga ihatag ngadto sa mga biktima.

Ang gikinahanglan kaayo sa mga nasunogan mao ang mga sapot, kahimanan sa pagluto, banig ug mga galamiton sa panimalay sama sa plato, tsinelas kay daghan sa mga biktima wala makahipos og mga dad-onon.

Matud ni Roger Paller, Public Information Officer (PIO) sa Mandaue nga ang mao nga dapit nasunogan ideklarar og State of Calamity aron nga ang siyudad makahatag og dugang tabang.

Si Violeta Cabada, City Social Welfare Officer, miingon nga sa inventory nga ilang gihimo ilang nasuta nga adunay 35 ka pamilya ug 154 ka individual nga nagpuyo sa maong dapit nga nasunogan.

Nasayran nga ang baratohon nga ceiling fan nga gitaod sa ikaduha nga andana sa panimalay nga gipanag-iya ni Melecio Ladraga maoy hinungdan sa pagsilaob sa kalayo.

Si Senior Fire Officer-3 Cefriano Codilla miingon nga ang kayo dali kaayo nga mitapon ngadto sa kabalayan sa silingan nila ni Ladraga kay pulos man kini   mga ginama sa light materials.

Matud ni Codilla nga ang nag-parking nga mga sakyanan sa daplin sa hagip-ot nga karsada nakapadugay sa pagsulod sa ilang mga fire truck. – /RUB) (BANAT NEWS)