Tinun-an nga wala mag-uniporme wala pasudla

CEBU, Philippines – Magtutudlo sa usa ka pribado’ng tunghaan sa Minglanilla gireklamo karon kay wala mopasulod sa duha ka bata nga tinun-an sa rason nga wala kini magsul-ob og uniporme.

Giangkon ni Aloha Bacaro, 38-anyos nga inahan sa mga tinun-an, nga ang iyang mga anak wala makasul-ob og uniporme tungod kay nabasa kini sa sagunson nga pag-uwan sa miaging semana.

Ang gireklamo ni Bacaro mao si Joselito Manabat, magtutudlo sa Southern Bethany Christian School sa Barangay Tunghaan, Minglanilla.

Si Bacaro nga taga Barangay Tungkop, Minglanilla, naabtan sa mga tigbalita nga mikuha og police report aron gamiton sa pagpasaka og kaso nga criminal ug administratiba batok ni Manabat.

Apan si Manabat, dihang gipangayoan sa iyang habig, nanghimakak sa pamahayag ni Bacaro.

Matud ni Bacaro nga aron lang g’yud makasulod ang iyang mga anak sa tunghaan nga wala magsul-ob og uniporme, gipadad-an niya kini og excuse letter nga pirmado niya.

Apan matud pa nga si Manabat mimando sa duha ka anak ni Bacaro nga ipadala ang ilang uniporme nga basa.

Tuod man gituman sa mga bata ang mando ni Manabat apan mipapahawa gihapon kini kanila sa tunghaan.

Si Bacaro miingon nga nauwawan g’yud ang iyang mga anak ug dili na kini ganahan nga mobalik pa sa tunghaan.

“Dugay na g’yud unta nga nihangyo ang akong mga anak nga dili na motungha sa maong eskwelahan pero ako lang sila nga giingnan nga antuson nalang kay graduating man sila,” matud pa ni Bacaro.

Si Bacaro naglaraw nga modangop sa Department of Education (DepEd) aron isumbong ang gibuhat ni Manabat. Gani nagplano usab si Bacaro nga mopasaka og kaso nga Child Abuse batok sa maestro.

Matud ni Manabat nga wa niya gibugaw ang mga estudyante gumikan lang kay wala magsul-ob og uniporme.

Si Manabat miingon nga niabot ang inahan sa duha ka bata ug didto na nagsugod ang panaglalis tungod sa kaisog sa inahan nga matud niya nagsige og siyagit-siyagit ug mihingan og bati sa mga magtutudlo.

Gipasabot ni Manabat nga buot unta siya’ng motubag ni Bacaro apan iya na lang kini nga gipugngan sa kahadlok nga maapektohan ang mga estudyante.

Nahibaw-an nga ang maestro mipasaka usab og reklamo batok ni Bacaro sa mga opisyal sa Barangay Tungkop. – /RUB (BANAT NEWS)