Ilawom sa Colon bridge wa na papuy-i
CEBU, Philippines - Gipaguba ni Pahina San Nicolas barangay kapitan Antonio Caruzca ang mga payag-payag nga gipuy-an sa mga libud-suroy ug mga badlungon ilawom sa taytayan sa dalan sa Colon.
Kini human niawas ang sapa niadto’ng Martes nga hapit nakaamong sa mga residente.
Matud ni Caruzca nga gipahimangnuan na ang mga namuyo sa ka delikado sa lugar.
Giklaro ni Caruzca nga dili iya’ng mga konstituwente ang namuyo ilawom sa taytayan sanglit kadaghanan taga Mindanao ug namuyo lang sa lugar kay uban kanila mohimo og mga salaod ug ang uban anha mopahulay ug mogamit og ginadili’ng drugas.
Matud ni Caruzca nga gipabantayan na niya 24-oras ang lugar aron dili na mobalik pagpuyo ang mga libud-suroy ug nakig-alayon sa San Nicolas Police Station aron motabang sa pagbantay.
Sa pagsubay sa Banat News sa taytayan sa dalan Colon, diha pa’y pipila ka bata’ng rugby boys nga nagsipit og mga rugby nga giputos sa plastic.
Usa ka 11-anyos nga bata’ng lalaki kinsa sabog pa sa gigamit nga rugby ang nipadayag sa Banat News nga mapasalamaton siya sa tawo nga nagluwas kanila. (BANAT NEWS)
- Latest
