Notisya sa COA di pa final— Gullas
CEBU, Philippines - Dili pa final ang gipagawas nga notice of disallowance sa Commission on Audit bahin sa P29-million Talisay City’s computerization project ug liquid fertilizer.
"The Notice of Final Demand dated August 5, 2015 by COA to the City of Talisay is not yet final, pending the Resolution of legal issues raised by Former Mayors Eduardo R. Gullas and Socrates Fernandez," matud pang Gullas sa iyang pamahayag nga gipadangat sa The Freeman/ Banat News.
Sa tulo ka pahinang notisya nga gipirmahan ni COA secretary Nilda Paras, gimandoan niini si Gullas, Fernandez ug 13 department heads nga iuli ang P29, 360, 762.70 nga gigamit sa siyudad pagpalit og mga computer sa siyudad ug liquid fertilizers tungod sa matud pa iregularidad. Niadtong tuig 2004, ang dakbayan sa Talisay mipatuman og P26.988 million computerization project alang sa mga opisina sa siyudad aron mas paspas ang mga transaksyon.
Apan ang COA miingon nga ang kantidad sa maong proyekto mokabat lang og P2.4 million, ug ang balanse nga P24.588 milyones gigamit sa uban pang galastuhan sa siyudad subay sa mando ni Fernandez alang sa pagpalambo ug pagpamalit og software alang sa nagkadaiyang opisina sa City Hall.
Matud pa sa COA adunay lapso ang mga mayor tungod kay kinahanglan unta nga adunay ordinansa sa Konseho una pa gamiton sa laing programa ang pundo. Samtang ang dul-an P3 milyones nga liquid fertilizers nga gipalit sa siyudad na overpriced.
"COA contends that they had no authority to realign the savings of the City for its computerization project. The City Attorney however, certified that they had such authority," pasabot pang Gullas.
Giklaro usab ni Gullas nga ang pagpalit sa mga software system niagi og public bidding ug giendorsar kini sa Bids and Awards Committee.
Matud pa ni Gullas ang notisya niingon nga way otoridad ang mga mayor pag-realign sa savings sa siyudad gikan sa computerization project niini ug di overpricing.
Dugang pa niya nga ang konseho maoy nipasar og resolusyon nga nagkompirmar ug nipalig-on sa pag-realign sa savings. Aduna sila karoy apela sa Korte Suprema bahin niini. (BANAT NEWS)
- Latest
