Duha ka “suspek” gi-clear sa pagkakaron

CEBU, Philippines - Gikumpirmar ni acting city director Senior Superintendent Armando Radoc sa Lapu-Lapu City Police Office nga mipatim-aw kagahapon sa ilang buhatan ang duha ka tawo nga unang gilambigit sa pagpatay sa 17-anyos nga si Karen Kaye Montebon  sulod sa iyahang panimalay sa Corinthian’s Subdivision sa sitio Suba-Masulog, barangay Basak sa miaging Martes sa hapon.

Ang unang miadto sa iyang buhatan niadtong Biyernes sa hapon ang 50- anyos nga lalaki nga taga Consolacion.

Samtang ang laing 40-anyos nga babaye nagpakita sa buhatan ni Radoc human kini gikuha sa kapolisan sa LCPO didto sa probinsya sa Bohol alas 3 sa kaadlawon kagahapon.  Ang duha ka suspetsado gikatahong pulos kanhi manag-kapuyo.

Sa miaging press conference ni Radoc, miingon kini nga iyahang nakaistorya ang duha ka suspetsado sa cellphone apan mihimakak nga wala sila’y kalabotan sa pagpatay sa  tinun-an sa University of San Carlos.

Giklaro niya nga iyahang giimbitar ang duha aron mahibaw-an ug maklaro kung tinuod nga dili sila ang nagpatay ni Montebon.

Nagkanayon sa Radoc nga ang duha parehas nga na –clear ang ngalan human sa paghatag og habig ngadto sa buhatan niini og migawas nga pulos sila “inosente.”

Gikuhaan hinuon nila og litrato ang duha ug gipakita ngadto sa mga saksi sa maong insidente apan negatibo ang resulta niini. Samtang aduna pay ikatulong tawo nga padayong gipangita.

“Actually, it’s not really a man-hunt gyud.  We are consolidating the evidence. Ang atong pagkuha sa ebidensya more on connecting circumstantial (evidence),” dugang ni Radoc.

Gipasabot ni Radoc nga bisan og naka-esplikar ang duha magpabilin gihapon silang ubos sa imbestigasyon alang sa dugang nga impormasyon nga pwede pang ma-link sa kaso ni Montebon. Human mipagawas og P500,000 nga ganti si Mayor Paz Radaza, si Radoc miingon nga wala pa sila’y bag-ong impormasyon nakuha sa pagkakaron.  (BANAT NEWS)