Agua oxinada giinom sa priso

CEBU, Philippines - Gumikan kay iya’ng makita sa pagkatulog ang panagway sa iya’ng amigo nga napatay, usa ka piniriso nisuway og hikog pinaagi sa pag-inom og agua oxinada sulod sa selda sa Pinamungajan Police Station pasado alas 8 sa nakalabay nga gabii.

Ang piniriso giila nga si Ahmed Nelmida, 26, kanhi electrician sa Tsuneishi Heavy Industries, taga barangay Butong, kinsa nag-atubang og kaso’ng murder nga napriso niadto’ng Septiyembre 6.

Sumala pa ni Senior Police Officer 2 Peter Cuanso Jr., imbestigador sa mao’ng hitabo, nga nahinabi sa Banat News nga una nila’ng gituohan nga muriatic acid ang giinom ni Nelmida apan sa ila’ng pagsubay sa sobra sa iya’ng giinom, ila’ng nasayran nga posible’ng ang tambal sa samad sa kamot ang iya’ng giinom.

Nahitabo ang insidente diha’ng ang kauban nga piniriso ni Nelmida ang naglimpyo sa inidoro sa ila’ng kasilyas.

Nakit-an na lang si Nelmida nga nagbulabula na ang baba hinungdan nga ila kini’ng gitabang ug gidala sa Pinamungajan District Hospital ug gibalhin sab dayun sa Vicente Sotto Memorial Medical Center (VSMMC).

“Nagtuo gyud mi nga muriatic acid ang giinom kadto’ng gilimpyo sa CR, pero pag-check nako sa iya’ng giinom, dili man kaayo isog ang baho, mao to’ng agua oxinada kay kung muriatic pa, pwerte’ng pataya gyud unta. Atol man gud to nga nanglimpyo sa kasilyas ang iya’ng kauban mao to’ng nagtuo mi primero nga muriatic to’ng nainom niya,” matud ni Cuanso.

Gitug-an ni Cuanso nga sa wala pa naghikog si Nelmida, suway sab unta kini nga ni-eskapo sa prisohan niadto’ng nakalabay nga hapon human niya giguba ang kisame sa prisohan apan nabantayan ug nabadlong sa mga polis.

Nabantayan sab sa mga polis nga sulod na sa pipila ka adlaw nagsige lang og hinuktok si Nelmida nga nagproblema sa iya’ng kaso nga wala’y piyansa.

Si Cuanso niingon nga sa diha’ng na-estorya sa iya’ng kauban si Nelmida, kini nitug-an nga gusto na lang magpakamatay kay sige lang niya makita ang nawong sa iya’ng silingan nga iya’ng giluba.

“Problemado ni siya sa iya’ng kaso unya tan-aw nako nakonsensya na ni siya kay makita man daw niya ang nawong sa iya’ng napatay kay amigo ra man daw to niya,” asoy ni Cuanso.

Personal nga bikil ang nahibaw-an ni Cuanso nga hinungdan ngano’ng napatay ni Nelmida ang iya’ng amigo.

Si PO1 Alberto Bibas, duty desk officer sa Pinamungajan Police Station, nibutyag usab nga si Nelmida gituohang naghambin sa kamingaw sa iya’ng pamilya ug naguol kini hinungdan sa suway nga pagkutlo sa iya’ng kinabuhi.

Luwas na hinuon sa delikado nga kahimtang ang piniriso nga padayun nga giatiman sulod sa tambalanan. (Jojo C. Ugdol ug Raymond D. Abarcas/GMR)(BANAT NEWS)