Lima nakuryentehan sa van
CEBU, Philippines - Nakuryentehan ang lima ka construction workers samtang nagpahiluna og container van sa Sta. Cruz, Tungkil, lungsod sa Minglanilla niadto’ng Huwebes sa hapon.
Ang kapolisan niila sa mga naangol nga sila si Quintilon Sabellano Jr., 46, taga Pardo; Lorwe Aloro Jr., 54, taga Labangon; Verillo Alibaya, taga Duljo Fatima, dakbayan sa Sugbo; Adam Lirasan, taga Tayud, Liloan ug usa ka Melbert Ofianga.
Base sa report sa kapolisan nga gisugo sa ila’ng labaw ang mga trabahante sa pagpadali og pahimutang sa container van nga himuong bunk house.
Apan ang container van giingong nasabod sa linya sa kuryente sa Visayan Electric Company hinungdan nga nangalagpot ang mga trabahante ug nahiagum og mga paso sa lawas.
Dali nga gitabang ang mga biktima sa Minglanilla District Hospital ug gibalhin sa Vicente Sotto Memorial Medical Center (VSMMC).
Si Insp. Christopher Castro, deputy chief sa kapolisan sa Minglanilla, niingon nga swerte ang mga biktima tungod kay wala maintimano sa pagkakuryente ug luwas na sa kuyaw nga kahimtang. Matud niya nga si Ofianga ug Sabellano ang naa na sa ward apan ang tulo naa pa sa stage nga trauma.
Hinuon ila pa’ng gipaabot ang kabanay sa mga biktima kun unsa ang ila’ng plano bahin sa hitabo. (Gabriel C. Bonjoc/GMR)(BANAT NEWS)
- Latest
