1,000 ka classrooms tukoron sa DepEd
CEBU, Philippines - Ang Department of Education sa probinsiya (DepEd) gikatakdang magtukod og kapin usa ka libo ka mga lawak saringan alang sa senior high school.
Si Arden Monisit, provincial DepEd superintendent mibutyag nga ilaha kining tukoron diha sa mga public schools sa probinsya.
Matud niya nga ang Department of Public Works and Highways (DPWH) maoy motukod niini samtang ang DepEd maoy mangita og luna kun asa kini tukoron.
Gikatakda nga sa buwan sa Mayo sunod tuig sa dili pa ang pagbukas sa klase mahuman ang pagpatukod sa kapin sa usa ka libo ka lawak aron maoy gamiton sa grade 11 ug 12.
Giklaro hinuon niya wala kini labot sa mga regular nga classrooms nga tukuron matag tuig alang sa bag-ong mga enrollees.
Ang kagamhanan sa probinsiya miangkon paghatag og 200 ka lawak-saringan alang sa senior high school ug aduna nay mga magtutudlo nga gibansay karon aron motudlo sa senior high schools ug mokuha pa sila og ikadugang niini.
Giingong dili moabot sa 500 ka magtutudlo ang gikinahanglan alang sa senior high school tungod kay duna nay existing nga magtutudlo sa high school nga makatudlo sa senior high school.
Ang mga unibersidad gitugutan usab kini nga motanyag og senior high schools. Apan nasuta nga kadaghanan sa mga private schools wala pa niini. (Brenda D. Batuto/EIM)(BANAT NEWS)
- Latest
