Cebu City Council gikiha

CEBU, Philippines - Usa ka magbubuhis ang nipasaka og kasong civil batok kang Cebu City vice-mayor Edgar Labella ug mga sakop sa konseho sa dakbayan diha sa korte aron dili gamiton ang halin sa South Road Properties (SRP) Lots.

Ang nisang-at og kaso mao si Romulo Torres, taga Sitio Panaghiusa, barangay Basak San Nicolas, Cebu City.

Siya nipasaka og petition for declaratory relief, injunction with prayer for temporary restraining order (TRO) and writ of preliminary injunction niadtong Huwebes sa Regional Trial Court. Gikwestyon ni Torres ang Cebu City Resolution No. 13-0418-2014 nga naghatag og otoridad kang Mayor Michael Rama pagbaligya sa SRP lots kay matud niya null and void kini.

Ang maong resolution matud ni Torres nakalapas sa City Ordinance No. 2332 nga gititulohan og “An Ordinance protecting the South Road Properties and its Stakeholders from Unlawful And Unauthorized Transactions and Dealings” nga gipasar sa city council niadtong Hulyo 18, 2012.

Samtang gikwestyon ni Torres ang maong resolusyon, iyang gihangyo ang korte sa pag- issue og TRO batok sa konseho aron dili sila makagamit sa halin nga gibayad sa SM Prime Holdings, Inc.; Ayala Lands, Inc; ug Filinvest Lands Inc. sa pagpalit sa luna sa SRP.

Gihangyo usab ni Torres ang korte nga ideklarar nga dili balido ang maong resolusyon kay nakalapas na man kining daan sa Cebu City Ordinance No. 2332.

Gawas kang Labella, ang mga gikiha mao silang city council Nestor Archival, Sr., Margarita Osmeña, Lea Japson, Eugenio Gabuya, Jr., Mary Ann de los Santos, David Tumulak, Nendell Hanz Abella, Sisinio Andales, Alvin Arcilla, Roberto Cabarrubias, Ma. Nida Cabrera, Gerardo Carillo, James Anthony Cuenco, Alvin Dizon, Richard Osmeña, Noel Eleuterio Wesceslao ug Philip Zapra. (Mylen Manto/EIM)(BANAT NEWS)