Minors nga mangunguot naluwas, lalaking nagsugo kanila gidakop

CEBU, Philippines - Walo ka mga minor de edad nga mga babaye nga gidudahang nalambigit sa pagpanguot dinhi sa dakbayan sa Sugbo ang naluwas sa kapulisan niadtong nakalabay nga hapon sa nagkadaiyang bahin sa dalan Colon ug barangay Ermita.

Lakip sa nadakpan ang usa ka tawo nga gituohang maoy nagsugo kanila paghimo sa krimen.

Ang mga minor nga babaye nag edad 12 hangtod 16 anyos positibong gitudlo sa usa ka 23 anyos nga lalaki nga trabahante sa Cebu City Hall nga ilang nabiktima niadtong Huwebes sa hapon.

Matud pa gialirongan siya sa upat ka bata nga naglakip sa 16-anyos nga mabdos nga nibangga sa iyang likod ug gikuot iyang pitaka ug cellphone.

Uwahi na siyang nakabantay ug nag-iyahay na og sibat ang grupo maong nidangop na lang siya sa Carbon Police Station. Sunod niyang nahibaw-an nadakpan na sila sa mga sakop sa Waterfront Police.

Si Chief Insp. Jose Gesto ang officer in-charge sa Waterfront Police miingon nga pirmeng maalarma sa ilang buhatan ang maong mga batan-on ug kadaghan na nila silang naluwas apan mobalik gihapon sa ilang pagpanguot.

Pasado alas 12 sa udto kagahapong adlawa mihimo og entrapment operation ang kapulisan sa Leon Kilat Street, dalan Colon ug nadakpan ang matud pa ilang agalon nga si Marcelo Amahan, 27, taga Gochan Street ning dakbayan.

Si Amahan matud pa tigbaligya og mga kinawat nga cellphone. Atol sa pagdakop kaniya, gipalitan siya sa poseur buyer og kinawat nga cellphone.

Apan dihang gikuhaan sa iyang habig, hugtanon kining nihimakak sa alegasyon kay matud niya usa siya ka pintor.

Ang mga minor gi-turn over na sa DSWD ug plano sab sa maong buhatan nga ipatawag ilang mga ginikanan. Samtang kasong paglapas sa Anti-Fencing Law ang atubangon ni Amahan. (Jojo C. Ugdol ug Sheriza Mae Uy/EIM)(BANAT NEWS)