Dancing inmates foundation tukuron

CEBU, Philippines - Tukuron ang usa ka foundation alang sa mga dancing inmates sa Cebu Provincial Detention and Rehabilitation Center, matud ni Capitol consultant on jail matters, Marco Ouano Toral.

Kini aron mahiluna ang ila’ng nadawat nga mga donasyon gikan sa mga manan-away sa matag pasundayag sa mga inmates sa CPDRC nga nisikat hangtud sa gawas sa nasud.

Matud ni Toral nga sa matag kita nga mahipos, ila kini’ng gitigom aron magamit sa mga piniriso sa panahon nga adunay emerhensiya ug sa uban pa’ng gamitan sa mga piniriso sama sa pagtukod og kapilya.

Gipahibawo ni Toral nga mokita sila og dili mominus usa ka gatos ka libo ka pesos matag tuig gikan sa kada buwan nila nga pasundayag.

Ang CPDRC dancing inmates mopasundayag matag katapusang Sabado sa buwan ug magdepende sab kung adunay mohangyo sa laing adlaw.

Gani gipahibawo ni Toral nga managlahi ang ila’ng mga dance steps depende sa mga sikat nga sayaw.

Ang foundation dumalahon sa mga opisyal sa mga selda sa prisohan sanglit ila ra sab ang income nga mahipos gikan sa ila’ng pagsayaw.

Gipahibawo ni Toral nga mohimo sab sila og website aron pag-accommodate sa taga gawas nga gusto motan-aw ug masayud sa history sa dancing inmates sanglit ubay-ubay sab ang ni-request niini para mahibawo sila unsaon pagbisita sa CPDRC.

Gawas niini makita usab sa kaparyentihan ug sa pamilya ang mga piniriso nga lakip sa dancing inmates.

Gani sa pagkakaron, nag-practice na ang mga inmates inubanan sa ila’ng choreographer nga si Vince Rosales alang sa bag-o nga stepping nga gitawag og summer time.

Gihulagway ni Rosales nga very cooperative ang mga priso tungod kay sila’ng tanan gusto niini gawas nga ni-income na, nisikat pa worldwide ug nakatabang pa sila sa gobiyerno pag-promote sa Sugbo.

Ang mga bag-o nga priso automatic kini nga pasayawon isip kabahin sa ila’ng recreation ug rehabilitation process sa pagwagtang sa gibati nila’ng kalaay samtang nagserbisyo sa silot nga pagkabilanggo tungod sa nabuhat nga krimen.

Gawas sa dancing inmates, mopahigayun sab og boxing ang CPDRC diin adunay mga boksidor ang gusto niini nga mo-sparing sa bisan kinsa nga amateur nga manulong sa CPDRC. (Renan Alangilan/GMR)(BANAT NEWS)