Madrigal nidangop sa Senado

CEBU, Philippines - Ang kanhi hepe sa Cebu Provincial Anti-Illegal Fishing Task Force nga si Loy Madrigal misumbong ngadto kang Senador Francis “Chiz” Escudero kabahin sa padayong operasyon sa ilegal nga panagat diha sa kadagatan sa kalungsuran sa probinsiya.

Si Escudero maoy chairman sa committee on environment ngadto sa Senado. Ang maong suwat ni Madrigal duna kini petsa nga Septiyembre 6, 2015. 

Si Madrigal kinsa mipaila nga maoy founder sa “Guardian of the Seas” nga usa ka non-profit organization miingon nga nagpadayon ang operasyon sa “hulbot-hulbot” nga usa ka klase sa ilegal nga panagat. Gibutyag ni Madrigal nga niadtong Agosto 26, 2015 ang mga miyembro sa Guardian of the Seas uban sa mga opisyal sa barangay sa Isla sa Kinatarkan, lungsod sa Santa Fe nakasikop og duha ka fishing boat nga nagpahigayon og hulbot-hulbot nga  panagat diha sa kadagatan sa lungsod.

Giingong ang tag-iya sa usa sa mga fishing boat kapitan kini sa usa sa mga  barangay sa lungsod sa Madredijos ug gi-operate og usa ka kagawad usab sa maong barangay.

Gibutyag usab ni Madrigal nga ang maong fishing boats kanunay na kining madakpan sa samang kalapasan apan pirmeng makalingkawas.Matud usab niya nga sa ilang pakisusi nasuta nga niadtong Agosto, 2014 expired na ang clearance sa nahisgutang fishing boats. Si Madrigal mipasangil nga ang Coast Guard sa lungsod sa Santa Fe ug ang kapolisan nagdumili sa pagkostudiya sa mga fishing boats nga masikop matag ilaha kining i-turn over kanila.  (BANAT NEWS)