Archival ambush–slay anhi husayon sa Cebu City
CEBU, Philippines - Gitugotan sa Korte Suprema ang gisang-at nga petisyon ni Cebu City Councilor Nestor Archival nga naghangyong ibalhin gikan sa Argao ngadto sa Cebu City ang venue sa pagdungog sa kasong multiple murder and frustrated murder nga gipasaka nila batok sa kanhi mga opisyal sa Highway Patrol Group-7.
“Note and grant the petition dated 22 October 2014 of Nestor D. Archival, City Councilor, Cebu City, requesting the transfer of venue of Crim. Case No. AR-5473 from Regional Trial Court (RTC), Branch 26, Argao, Cebu, to the RTC of Cebu City, Cebu,” sumala pa sa notisya nga gipirmahan sa deputy division clerk of court Teresita Aquino-Tuazon.
Gimandoan usab ni Tuazon ang clerk of court sa RTC Branch 26 sa Argao nga ipasa ang records sa kaso sa Office of the Clerk of Court sa RTC Cebu City.
Si Atty. Democrito Barcenas, usa sa mga abogado sa gi-ambush patay nga si Atty. Noel Archival niadtong Pebrero 18,2014 sa barangay Coro, Dalaguate miingon nga kun mabalhin na ang record sa kaso i-raffle kini dayon kun asa nga branch husayon.
Ang mga akusado sa maong krimen mao sila si kanhi Senior Superintendent Romualdo Iglesia, Senior Inspector Joselito Lerion, ug PO1 Alex Bacani.
Gawas kang Atty. Archival, napatay usab ang iyang drayber nga si Alejandro Jayme, iyang bodyguard nga si Candido Miñoza samtang naangol ang iyang on-call assistant nga si Paolo Cortes.
Una nang nagpa-inhibit si RTC Judge Maximo Perez sa Branch 26 pagkupot sa maong kaso human niya gipagawas ang warrant of arrest batok sa mga suspek nga hangtud karon padayon pang gipangita, aron di siya mapasanginlang may gidapigan. (BANAT NEWS)
- Latest
