Managkapuyo gikasohan na

CEBU, Philippines – Gipasakaan na og kaso kagahapong adlawa sa kapulisan sa lungsod sa Minglanilla ang managkapuyo nga gipasanginlang nakapatay sa 2-anyos nga batang babaye niadtong Domingo sa gabii ug nadiskubrehang patay niana nang Lunes sa buntag sa ilang balay sa sitio Panaghiusa 1, barangay Tunghaan.

Si Chief Inspector Richard Gadingan, hepe sa kapulisan sa Minglanilla mibutyag nga kasong murder in relation to Child Abuse ang gipasaka batok sa ama-ama nga si Nicodemo Deloy, 30, samtang obstruction of justice ug gisusi kun mahimo bang parricide ang ipasaka batok sa inahan nga si Ailene Donaire, 25.

Matud pa ni Gadingan, ang piskaliya na maoy motan-aw kun unsay haom nga kaso alang sa inahan sa biktima kinsa giingong misuway pagtabon sa iyang kapuyo sa gibuhat niini sa iyang anak nga si Ritsanlyn.

Ang kapolisan adunay nakuhang 11 anyos nga testigo nga matud pa nakakita sa pagkulata ni Deloy sa biktima. Gipaabot pa sa kapolisan ang resulta sa autopsy sa patay'ng lawas sa bata karong adlawa aron isuporta sa ilang ebidensya.

Si Gadingan miingon nga miangkon na kaniadto ang suspetsado nga nakulatahan niini ang bata hangtud nga kini migahi na ug wa na mimata.

"Miangkon na gyud sila nga ilang nabun-og ang bata kay lagi naglalis-lalis na kini silang daan," asoy pa ni Gadingan nga kinsa nagdudang sabog sa ginadiling drugas ang duha atol sa paghimo sa krimen. Ang duha gipaubos na sa drug test.

Ang managkapuyo nasakpan dihang nangayo unta og death certificate sa kapitan sa ilang barangay apan dunay nakatug-an sa mga otoridad nga adunay dautang gibuhat ang duha ngadto sa bata. Tuod man, base sa inisyal nga pagsusi sa mga imbestigador nangalubo ang ngipon sa bata ug daghan kini kaayo og lagom sa kalawasan ug sa ulo.

Usa sa mga kabanay sa biktima ang nipadayag og dakong pagmahay sa gibuhat sa mga suspek ug gusto kining masilotan gyud ang duha.

Pwerte ang pagdangoyngoy sa inahan sa bata sa dihang nahinabi sa Banat News diha sa prisohan ug kini nitug-an nga grabe ang iyang pagbasol nga wa niya mapanalipdi iyang anak sa gihimo sa iyang kapuyo.

Matud pa niya naunhan siya og kahadlok kang Deloy hinungdan magpakahilom na lang siya matag higayon nga dagmalan ang iyang anak.

Si Deloy usab sa iyang bahin kinsa niangkon nga tigamitan og ginadili nga drugas miingon nga nahimo niya ang maong salaod tungod sa iyang kalagot kay nagsige og hilak ang bata ug nakalimot siya sa iyang kaugalingon. – /EIM) (BANAT NEWS)