Prinsipal patay sa school bus

CEBU, Philippines – Patay ang usa ka prinsipal sa Carcar Academy ug kritikal ang bana niini human sila nadasmagan og school bus nga gipanag-iya sa St. Catherine College kagahapon sa buntag diha sa national highway, sa barangay Perrelos sa dakbayan sa Carcar.

Ang namatay naila nga si Soledad Alinio, ug prinsipal sa Carcar Academy sa maong siyudad, samtang ang iyang bana nga talandugon ang kahimtang ug gidala sa usa ka pribadong tambalanan sa dakbayan sa Sugbo mao si Eleuterio Oamilda Alinio, 60, kinsa maoy nag-drive sa motor nga ilang gisakyan.

Gitanggong karon sa kapolisan ang driver sa school bus sa St. Catherine College nga si Catalino Tanod-tanod Manayaga,43, taga barangay Tuyom sa maong dakbayan.

Matud pa ni Non Uniform Police Christopher Enad, sa Carcar Police Station nagsunod ang school bus , usa ka bus pasaheroan ug motor sa magtiayon padung sa direksyon sa Cebu City apan gikatahong ni-overtake ang school bus ug sa paghimo niini, napunggit ang motor.

Dali nga gidala sa Carcar City District Hospital ang magtiayon, apan gideklarar ni Dr. Joseph Ryan Degracias si Soledad Alinio nga patay samtang daling gidala sa tambalanan dinhi sa siyudad sa Sugbo si Eleuterio.

Ang cashier sa Carcar Academy Sosima Ibona, nga nahinabi sa Banat News nibutyag nga nasubo ang kinatibuk-an nga sakop sa eskuylahan nga gialagaran ni Alinio ug gikanselar usab nila ang unang adlaw sa pagbukas sa ilang intramurals gumikan sa nahitabo agi og pagtahod ngadto sa ilang prinsipal.

Sumala pa ni Ibona, human sa ilang flag ceremony, nagrosaryo sila alang kang Alinio nga gitambongan sa tanang mga tinun-an ug trabahante ug pagkahuman gikanselar gilayon ang klase. – /EIM) (BANAT NEWS)