2 ka bana nagselos, namusil, nanunggab

CEBU, Philippines – Usa ang patay ug duha ang naangol human duha ka bana ang nanunggab ug namusil sa laing mga lalaki nga pulos gidudahang dunay relasyon sa ila’ng mga asawa sa managlahing lugar sa dakbayan sa Sugbo sa nakalabay nga gabii.

Pasado alas 6 sa hapon, patay ang usa ka production worker sa Golden Mac and General Services human gipusil sa ulo sa usa ka lalaki nga nagselos.

Ang biktima naila nga si Romel Villomo, hingkod nga taga Maguikay, dakbayan sa Mandaue samtang ang suspek mao si Junfrey “Bordy” Llanto, 32, minyo ug nagpuyo sa mao’ng dapit.

Nahitabo ang pagpamusil diha’ng nibisita ang biktima sa balay sa magtiayon.

Nag-away ang magtiayon ug wala nahibawo ang biktima nga siya ang hinungdan.

Nigawas sa balay si Llanto nga nagbitbit og revolver dayun pusil sa kilid sa tangkugo ug nawong sa bitkima.

Samtang alas 8 pasado sa gabii, usa ka lalaki ug usa ka babaye ang nakaangkon og daghang samad dinunggaban sa lawas human gihansakan og kutsilyo sa usa ka bana nga nagduda nga ang duha adunay relasyon sa Basak-San Nicholas.

Ang mga biktima giila nga sila Lynuel Salazar, 29, ug Maricel Villa, 44, kinsa asawa sa suspek nga si Tito Villa, 51, nga nagpuyo sa Laray, Inayawan.

Nasayran nga taud-taud na nga wala nag-ipon ang magtiayong Villa gumikan sa reklamo sa asawa nga dapatan siya sa iyang bana.

Samtang nagkaon og barbecue si Salazar kalit lang niduol si Tito nga wala’y daghang estorya niluba sa biktima.

Suway pa unta nga nidagan ang biktima apan gigukod sa suspek ug gisigehan og dunggab hangtud gibadlong sa mga istambay ug gidala sa tambalanan.

Human sa pagpangdunggab, giadto sab sa bana ang iya’ng asawa sa gipuy-an ug mao na sab ang gidunggab.

Mga samad sa kamot ug paa ang naangkon sa asawa sa pagsinagang.

Nakahigayun og tukmod ang asawa sa iya’ng bana hangtud kini nakagawas sa balay ug nakapangayo og tabang.

Ang mga biktima nihimakak sa pasangil ni Tito nga aduna sila’y relasyon. – /GMR) (BANAT NEWS)