Kapin 100 patay didto sa Mecca

CEBU, Philippines – Kapin sa 100 ka tawo ang namatay ug kapin 200 usab ang nangaangol sa pagkatumba sa usa ka higanteng construction crane padung sa Mecca Grand Mosque atol nga dautan ang panahon niadtong Biyernes didto sa nasud sa Saudi Arabia.

Ang maong aksidente natumong sa mga adlaw diin nangandam ang maong relihiyosong lugar sa pagsugod na sa tinuig nga hajj pilgrimage. Matud pa sa report sa Interaksyon.Com gikan sa report sa Saudi Press Agency, nadala sa kusog nga huros sa hangin ang crane nga nagbarog duol sa compound niadtong Biyernes sa hapon subay sa pamahayag sa tigpamaba sa maong simbahan nga si Ahmed bin Mohammad al-Mansoori.

Usa sa mga nagtrabaho sa maong mosque miingon nga nakatabang ang Al-Tawaf Bridge nga maoy nagtabon sa agianan palibot sa “Kaaba” ug maoy nakaingon sa pagkaputol sa crane human nitugpa didto.

"If it weren't for Al-Tawaf bridge the injuries and deaths would have been worse," matud pa ni Abdel Aziz Naqoor.

Ang Kaaba mao ang sentro sa mosque nga maoy dayuhon sa mga Muslim sa tibuok kalibotan aron mag-ampo ug kabahin kini sa hajj pilgrim nga magsugod karong Septiyembre 21.

Sagad sa mga biktima nangandam pagduyog pag-ampo sa “maghrib” nianang gabhiuna dihang nahitabo ang aksidente.

Gimandoan karon sa gobernador sa Mecca region, nga si Prince Khaled al-Faisal ang ilang kapolisan paghimo og imbestigasyon sa maong insidente ug patubagon ang angay manubag niini.

Gibasol sa mga konserbatibong Muslim ang konstruksyon palibot sa maong mosque aron palapdan ang palibot niini aron makapasulod og 2.2 milyones ka tawo alang sa Haj Pilgrims. Aduna karoy dul-an 800,000 ka pilgrims nga nangabot sa Mecca alang sa tinuig nga Haj, mas gamay kini itandi sa miaging tuig nga miabot og duha ka milyon.

Wa pa hinuon matino kun dunay mga Pilipinong Muslim nga naapil sa mga biktima. (Gikan sa Wires/EIM)