Konsehal Caballero mag-VM sa Talisay
CEBU, Philippines – Gipahibawo ni Konsehal Danny Caballero sa dakbayan sa Talisay nga gikonsiderar na niya ang tanyag isip runningmate ni Bise Mayor Romeo Villarante sa 2016 elections.
Giingong dili maglisud si Caballero sa pagdaug sanglit numero uno man siya’ng konsehal karon ug labaw sa tanan iya na’ng napakita ang iya’ng katakus sa pagtabang sa mga nanginahanglan.
Matud ni Caballero nga iya na’ng gikonsulta ang iya’ng pamilya ug mga lider ug positibo ang tubag nga andam gihapon sila’ng mopaluyo kun unsa’y iya’ng plano sa sunod nga eleksyon.
Giangkon sa konsehal nga lisud alang kaniya ang tahas pagdagan sa taas nga posisyon sanglit lig-on usab ang iya’ng makaatbang.
Matud ni Caballero nga dili siya makatalikod ni Villarante nga iya’ng gikauban sukad pa niadto’ng 2010 nga eleksyon ug gihulagway nga ligdong ug tarong samtang wala siya’y plano’ng mobiya sa ila’ng grupo uban ni Konsehal Aldin Diaz.
"Ako lang gi-ampo nga kadto’ng mga tawo nga nisalig kanako ug sa amo’ng grupo kaniadto ug karon nga unta dili sila molubad sa pagsuporta namo," matud ni Caballero.
Matud ni Caballero nga kung siya ang buligan, iya gyud kini’ng suklian og tinud-anay ug kinasingkasing nga pagserbisyo sama sa iya’ng gihimo karon.
Si kanhi bise mayor Allan Bucao ug Konsehal Valeriano Ylanan ang posible’ng mga kaatbang ni Caballero. – /GMR) (BANAT NEWS)
- Latest
