Tinai sa manok giawayan

CEBU, Philippines – Natugaw ang pagkatulog sa mga residente sa sitio Rojaluca, Poblacion, dakbayan sa Talisay tungod sa away sa tinai sa manok niadto’ng Sabado sa gabii.

Grupo sa mga bayot ang giingong nakig-away sa usa ka lalaki’ng nakainom kinsa dungan nga nipalit og barbecue nga tinai sa manok sa usa ka Noni nga gitawag sa kadaghanan nga "Suki".

Matud ni Suki nga naabot ang lalaki nga nakainom dungan sab sa grupo sa mga bayot nga gikan sa lungsod sa Minglanilla.

Giingong naglagot ang lalaki nga naunhan siya sa mga bayot nga naglumba pagpunit sa iya’ng tinda.

Nitumaw ang ka- saba human nga nagyawyaw ang lalaki ug atol sa tingbayad, nipasumbingay kini ngadto sa mga bayot nga dili mag-magic-magic sa pagbayad nga nagpasabot nga dili libugon si Suki sa pagkwenta sa ila’ng gikaon.

“Mura’g nibati lang pud to nako ang lalaki ba tungod sa kadugay seguro namo nga nag-suki,” asoy ni Suki.

Nialma ang usa ka bayot hangtud nga ninglaban ang tanan ug gitabangan ang lalaki.

Naundang lang ang kasamok diha’ng si Suki nitingug tungod kay dili na siya kadungog sa gipangyamar nga gikaon sa mga kustomer.

Ang mga bayot nanguli sakay sa awto samtang niuli lang sab ang lalaki sakay sa iya’ng motorsiklo dala ang mga tulisok sa mga bayot. – /GMR) (BANAT NEWS)