Managsuon natabunan

CEBU, Philippines – Duha ka managsuon ang natabunan sa nahunlak nga rip-rap sa usa ka gihimong subdivision nga napunta sa ilang giabangang balay  diha sa sitio Kalubihan, barangay Casili sa siyudad sa Mandaue kagahapon sa hapon.

Atol ning pagsulat sa balita alas-9 pasado sa gabii, padayon pang gikubkob sa mga rescuers sa Mandaue City Disaster Risk Reduction Management Office, Bureau of Fire Protection ug barangay rescuers ang managsuong sila si Vladimir,19, ug Vicente Cariquitan Jr., 13 anyos. Matud pa naktia na si Vladimir apan wala pa maugkat.

Ang maong natabunan nga boarding house gipanag-iya sa usa ka Helen Magale ug dunay nag-abang nga upat ka pamilya nga naglakip sa pamilyang Cariquitan.

Matud pa ni Liderato Libre nga nakahinabi sa Banat News nga usa sa mga nag-abang sa maong balay nakabantay siya nga dunay nangatagak sa ilang atop nga dagkong mga bato gikan sa rip-rap sa Villa San Sebastian Subdivision dihang mibunok na ang uwan. Tungod niini, dali niyang gipagawas iyang asawa ug lima ka mga anak ug misunod usab ang ubang mga nag-abang nga pamilya nila ni Ryan Tonilon, Arvil Toro ug pamilyang Cariquitan.

Apan si Analy, inahan sa managsuong natabunan miingon sa mga tigbalita nga naabtan gyud sila pagdahili ug wala na nila masultihi ang duha ka anak. Si Ericson Cariquitan kinsa nakahinbi sa Banat News miingon nga diha ra siya sa pikas balay atol sa pagkahitabo ug nakabantay siya pagdahili ug dali siyang midagan padung sa balay ug mao say paghagsa sa yuta. Iyang nabitad iyang 3-anyos nga manghod nga si Chrisly kinsa naputos og lapok.

Si Analy mibutyag sa Banat News nga kun nahitabo kini atol nga nangatulog ang mga nag-abang posibleng mas daghan silang makalas.

Si Libre kinsa adunay lima ka mga anak, mibutyag nga hasta ilang mga binuhing hayop naapil sa natabunan ug tapot-lawas ra ilang naluwas. Silang mga namuyo sa balay nipasilong sa usa ka giabandonar nga balay sa ilang silingan atol ning pagsulat sa balita samtang nagpadayon ang search and rescue operation sa managsuon.

Ang mga rescuers nigamit og dagkong mga suga ug backhoe ingon man water pump sa maong operasyon sa pamasin nga makuhang buhi ang managsuong Cariquitan.

Nasayran usab gikan ni Casili barangay kapitan Paterno Cabatingan nga ang natabunang panimalay sakop sa iyang barangay samtang ang subdivision sakop sa silingan nilang barangay nga barangay Tawason kansang kapitan mao si Jun Arcilla.

Sumala pa ni Cabatingan, wala siya makadawat og reklamo sa mga molupyo bahin sa nangatagak nga mga bato sa nangaging mga adlaw ug nagduda siyang didto mireklamo ang mga molupyo sa pikas barangay.

Ang mga biktima anha ipahiluna sa usa ka eskuylahan sa barangay ug hatagan sila sa nag-una nilang panginahanglan. – /EIM) (BANAT NEWS)