Radio group motabang sa Mandaue City
CEBU, Philippines - Ang mga sakop sa radio groups sa nagkadaiyang dapit sa dakbayan sa Mandaue mipadayag sa ilang dakong tinguha sa pagtabang sa kagamhanan alang sa pagpatuman sa kalimpiyo sa kabarangayan, paghapsay sa kahimtang sa trapiko, kalinaw ug uban pa.
Ang 40 ka mga grupo sa Regional Communications Network kon Recon-Zugbo gipangulohan ni barangay Centro Kapitan Ian Cortes.
Ang grupo moabag sa siyudad pinaagi sa paglabay og impormasyon gamit ang ilang kaugalingong mga hand-held radios ngadto sa mga hingtungdang departamento sama sa problema sa trapiko nga ilang maagian.
Sa nasayran nga ang maong pundok ang natukod niadtong 2012 sa dakbayan sa Mandaue nga unang nagdala sa pangalan nga Recon-Mandaue.
Ang susamang mga grupo nagamit usab kun adunay mga dagkong kalihokan sama sa nangaging mga Sinulog nga diin kinahanglan kaayo ang komunikasyon alang sa seguridad ug luwas nga pagsaulog sa maong okasyon. (BANAT NEWS)
- Latest
