LP Cebu naghuwat kang Roxas
CEBU, Philippines - Maghuwat sa pagbalik ni kanhi Department of Interior and Local Government Secretary Mar Roxas II ang mga sakop sa Liberal Party sa probinsiya sa Sugbo aron tukion ang mga problema sa ila’ng partido.
Si Gobernador Hilario Davide III, provincial chairman sa LP, nagkanayon nga wala pa’y tukma’ng schedule si Roxas nga mobalik sa Sugbo.
Si Roxas giingong nisaad nga mobalik aron tukion ang mga nitumaw nga problema sa LP sa probinsiya sama sa pagbiya sa ila’ng mga sakop sa una’ng distrito kinsa nasagmuyo sa pagtudlo kang Kongresista Gerald Anthony “Samsam” Gullas isip district chairman bisan dili ka partido.
Ang mga sakop sa LP nireklamo tungod kay si Gullas sakop kini sa Alayon Party nga nakig-alyansa sa LP.
Si Davide nibutyag nga nipadangat na siya og text message kang Roxas apan wala pa’y tubag sa tukma’ng panahon sa pagbalik.
Gipasabot ni Davide nga okupado kaayo si Roxas tungod sa paglibot sa ubang probinsiya.
Ang una’ng distrito wala pa’y klaro’ng line-up sa eleksiyon sa 2016. (BANAT NEWS)
- Latest
