Kawatan ang ubang libudsuroy

CEBU, Philippines - Miabot  og 48 ka libudsuroy nga kabataan, apil ang 14 ka dalagita, ang na-rescue sa mga polis ug mga kawani sa Cebu City Hall gikan sa gipuy-an nila ilawom sa tulay sa barangay Mabolo ug sa Banilad.

Ang uban kanila nalambigit sa pagpangawat kay adunay mga butang nga kinawat nga nakuha gikan kanila, sama sa mga ATM cards.

Daghang mga mahait nga hinagiban, sama sa kutsilyo, pitsikurno nga adunay gipasiwil nga kutsilyo, “improvised” nga armas, mga shabu ug mga pitaka nga gituohang kinawat ang apil sa nasakmit.

Apil sa nasakmit mao ang ATM cards nga gipanag-iya sa usa ka Kevin Gil Zamoras nga mitug-an nga ang iyang bag gikawat samtang nagkaon siya sulod sa usa ka mall sa Mandaue kaniadtong Martes.

Usa ka dalagita nga apil sa na-rescue mitug-an nga ang iyang mga kauban nalambigit sa dautang binuhatan sama sa pagpangawat ug pagpanulis.

Ang mga kawani sa City Hall gikan sa City Environment Sanitation Enforcement Team (CESET), DSWS, tanod ug mga polis nga gipangulohan mismo ni Vice Mayor Edgardo Labella mironda sa tagoanan sa mga bata ilawom sa tulay diha sa Mabolo ug didto sa Banilad.

Kini agi og pagresponde sa daghang reklamo bahin sa mga rugby boys nga anaa mag-estar sa ilawom sa duha ka taytayan. Ang mga bata dili pulos taga dakbayan sa Sugbo.

Matud ni Labella nga ang uban sa mga bata nagpuyo sa Mandaue ug sa lainlaing mga dapit sa probinsya ug nagkapundok lang diha sa mao nga dapit.

Gusto ni Labella nga sutaon kinsa sa mga na-rescue nga lapas na sa 15-anyos nga adunay bug-at og salaod aron patun-an kun angay ba kini nga pasakaan og kaso.

Ang mga bata ipanghatod sa tagsa-tagsa nila ka pinuy-anan apan ang uban kanila dili na gusto nga mopauli.  (BANAT NEWS)