Level 3 drug pusher nadakpan

CEBU, Philippines - Nadakpan sa mga sakop sa City Intelligence Branch (CIB) sa Cebu City Police Office ang usa ka gidudahang level 3 drug pusher  diha sa Sitio Kambitas, Brgy. Pung-ol Sibugay sa dakbayan sa Sugbo sa nakalabay nga gabii.

Ang dinakpan naila nga si Elezier Bontilao, 28, nagpuyo sa maong dapit kinsa giingong hawod-hawod sa maong lugar.

Gitug-an ni Superintendent Romeo Santander, hepe sa CIB nga nahinabi sa Banat News nga ilang gipanid-an sud sa pipila ka adlaw ang suspek tungod sa report nga namaligya kini og drugas sa lugar ug ‘gahi’ kini sa maong dapit ug pirmeng mamusil sa mga silingan gamit ang improvised nga armas nga gibalahan og bolitas.

Niadtong nakalabay nga gabii mihimo og buy- bust operation ang kapulisan ug napalitan siya og usa ka gamay nga paketeng shabu.

Sulod sa balay ni Bontilao nasakmit pa sa taga CIB ang laing 30 ka gagmay nga pakete sa shabu, usa ka .9mm pistol ug duha ka improvised .22 air riffle ug napulo ka bolitas nga bala niini.

Nakuha ‘sab sa kapulisan ang salapi nga P4,800 nga gituohang kinitaan sa ilegal nga drugas sa dinakpan.

Kasong paghupot ug pagpamaligya og shabu lakip na ang paghupot og ilegal nga armas ang atubangon sa suspetsado. (Jojo C. Ugdol/EIM)(BANAT NEWS)