Amoebiasis sa Cebu City migrabe

CEBU, Philippines - Dul-an 100 porsiyento ang pagsaka sa mga kaso sa acute bloody diarrhea (ABD) dinhi sa dakbayan sa Sugbo kun itandi sa nilabay nga tuig sa susama gihapong mga buwan sumala pa sa Department of Health-7. Gikan sa Enero hangtod Septiyembre 5 adunay nasakit niini nga 2,178 ka tawo nga mas daghan itandi sa 1,094 ka kaso sa miaging tuig.Kasagaran sa mga nasakit niini mga batang nag-edad usa ngadto sa 10-anyos.

Base sa talaan, nag-una ang dakbayan sa Sugbo (1,332 ka mga kaso) ug siyam niini ang namatay; samtang sunod usab ang  Tubigon- 50, Tuburan-58, San Francisco-57, Lapu-Lapu City-45, Maribojoc-35, Toledo City-28, Lazi-27, Santa Catalina-26 ug Sogod-24.

Matud pa ni Dr. Jaime Bernadas ang pangulo sa DOH-7, ang ABD usa kini ka sakit sa tiyan tungod sa kagaw nga amoeba o Amoebiasis. Makuha kini kun nakakaon o nakainom og hugaw ang tawo. Sumala pa ni Bernadas daghan hinuon og tambal alang niini apan kinahanglang di pasagdan ang nasakit niini ug dad-on dayon sa tambalanan aron di mograbe.(Rowena Capistrano/EIM)(BANAT NEWS)