500 ka drayber dakpunon
CEBU, Philippines - Dul-an 500 ka mga drayber ang gipangita karon sa Cebu City Traffic Office human nga nalutsan sila og bench warrants tungod sa ilang mga kalapasan sa balaod sa trapiko.
Matud pa sa executive director sa CCTO nga si Atty. Rey Gealon, seryoso ang CCTO sa pag-implimentar sa City Ordinance 801 o ang Traffic Code of the City of Cebu. Ang walo ka municipal trial courts sa siyudad mipagawas og bench warrants batok sa 477 ka mga badlungong mga drayber.
Ang CCTO mopasaka og kaso sa mga drayber nga maisyuhan og citation tickets sa mga traffic enforcers kun dili nila mabayran ang multa.
Matud ni Gealon, kinahanglang makabayad sila sa multa usa ka semana gikan sa pag-isyu sa citation ticket aron dili mapasaka ang kaso ngadto sa korte.
Adunay kopya ang Philippine National Police ug National Bureau of Investigation sa mga warrants of arrest ug mamahimong sila maoy modakop sa maong mga drayber.
Tungod niini, giawhag ni Gealon ang mga drayber nga naisyuhan kaniadto og citation tickets sa siyudad nga wala pa mamayad sa ilang multa aron ilaha na kini mabayran ug malikay sa dugang kahasol kun sa korte na kini husayon.(Jean Marvette Demecillo/EIM)(BANAT NEWS)
- Latest