Nagsinggit-singgit sa misa gidakop

CEBU, Philippines - Gibalhug sa bilanggoan ang duha ka tawo nga nagsinggit-singit atol sa misa sa simbahan sa Odlot, dakbayan sa Bogo alas 5 pasado sa hapon sa niagi’ng adlaw. Ang mga sakop sa Barangay Peace Action Team (BPAT) kauban sa mga barangay tanod ang nidakop nila’ng Joey Bajenting, 28, ug Gerard Siclot, 52, pulos minyo ug nagpuyo sa mao’ng dapit.

Matud ni Police Officer 2 Herbert Honoredez sa Bogo City Police Station nga gikan nag-inom ang duha sa usa ka tindahan ug diha’ng nangahubog kalit nisulod sa simbahan ug nagsinggit-singgit atol nga nagmisa ang pari.

Diha’ng girekisa ang kalawasan sa duha, mao’y nakuha ang mga tinfoil nga nakapatumaw sa pagtuo nga naggamit usab og shabu ang mga dinakpan.

Samtang nagtingkagol sa selda sa Tuburan Police Station ang 27-anyos nga anak nga gidudahang ubos sa impluwensiya sa drugas human kulataha ang iya’ng 47-anyos nga inahan sa baragay Colonia pasado alas 10 sa nakalabay nga buntag.

Giila ang anak nga si Sofronio Benting Jr., ulitawo, samtang ang nireklamo’ng inahan mao si Mercy.

Matud ni Senior Police Officer 2 Martel Arriesgado, desk officer sa Tuburan Police Station, nga bun-og sa dughan ug ubang parti sa lawas ang naangkon sa inahan human gikulata sa anak sa wala masayri nga hinungdan. Sa pagrekisa sa kapolisan sa suspek, ila’ng narekober ang usa ka paltik nga .38 revolver nga adunay duha ka bala ug pipila ka drug paraphernalia.  (BANAT NEWS)