Bañas hulipan ni Gentiles

CEBU, Philippines -  Hayan si Chief Supt. Jose Gentiles nga karon officer-in-charge ug deputy director sa Directorate for Intelligence mopuli kang Chief Supt. Prudencio “Tom” Bañas isip director sa Police Regional Office-7.

Ang tinubdan gikan sa Campo Crame niingon nga si Bañas ibalhin sa lain nga buhatan.

Apan ang hepe sa directorial staff sa PRO-7, Senior Supt. Rey Lyndon Lawas, niingon nga wala siya’y kasayuran sa mao’ng balita.

Sigun pa ni Lawas nga dili pa klaro kung si Bañas ang mabalhin ba gawas sa PRO-7 apan masabtan na sa tuno sa sinultihan ni Bañas kinsa niingon nga dunay posibilidad nga siya mabalhin.

Ubos sa pagdumala ni Bañas, ang PRO-7 nakadawat og mga commendations gumikan sa wala’y undang nga kampanya batok ilegal nga drugas ug armas.

Sulod sa duha ka tuig, ang PRO-7 ang napili nga top performing regional office tibuok nasud sa kampanya sa drugas ug ilegal nga armas.  Si Gentiles usa ka Police Attaché sa Washington DC ug gradwado sa PMA Class 1984.  (BANAT NEWS)