Bisan ilegal di ipatangtang

CEBU, Philippines - Wala pa gub-a sa kagamhanan sa probinsiya sa Sugbo ang ilegal nga gitukod nga viewing deck sumpay sa balay ni Provincial Assessor Alma Sibonga sa Kalunasan, dakbayan sa Sugbo.

Kini human nihangyo ang bana ni Sibonga nga si Engineer Edgar Sibonga kinsa consultant sa Kapitolyo nga dili ipaguba.

Si Gobernador Hilario Davide III nimando na sa pagpaguba sa ilegal nga gitukod ni Sibonga sa luna sa probinsiya.

Matud ni Jone Siegfred Sepe, hepe sa Provincial General Services Office (PGSO), nga nihangyo si Edgar sa probinsiya ug sa Pagtambayayong Foundation Inc. nga paliton niya ang luna nga natukuran sa viewing deck.

Ang luna sa Kalunasan joint venture kini tali sa probinsiya ug Pagtambayayong.

Gipasabot ni Sepe nga wala una nila ipaguba ang viewing deck tungod kay basin og maalang-alang ang desisyon ug basin usab unya nga tugutan sa hangyo si Sibonga.

Gibutyag ni Sepe nga si Sibonga nipadala og suwat sa probinsiya ug niangkon sa iyang kalapasan ug nihangyo nga paliton na lang ang luna. (BANAT NEWS)