P18M na ang donasyon alang sa IEC

CEBU, Philippines - Miabot na og P18 milyones ang natigum nga salapi sa Archdiocese of Cebu gikan sa ilang programa nga “Piso Para sa Misa ng Buong Mundo” nga gilusad sa miaging tuig.

Matud ni Fr. Charles Louis Jayme, national coordinator sa Fund Raising Drive, nga 58 porsiyento kun subra sa katunga sa maong natigum nga salapi gikan dinhi sa Sugbo.

Sumala pa ni Jayme nga sa gilusad nila nga programa bisan ang mga kabus makatabang alang sa kalampusan sa International Eucharistic Congress nga ipahigayon dinhi sa Sugbo sunod tuig.

Gibutyag ni Jayme nga gawas sa PPMM, duna pay laing Fund Raising Activity nga gidumala ni Msgr. Roberto Alesna para gihapon sa kalihukan sa IEC 2016.

Karong Nobiyembre, pahibaw-on na usab nila ang publiko sa kalamboan sa ilang pagdawat og mga donasyon sa tibuok nasud.

Si Msgr. Joseph Tan, tigpamaba sa Archdiocese of Cebu, nibutyag nga karong Nobiyembre ang Duros Construction pormal na nga mo-turn over sa IEC Pavillion ngadto sa Archdiocese of Cebu.

Gihangyo ni Tan ang katawhan nga aron magmalampuson ang IEC kinahanglan g’yud sila nga moparehistro ug moapil sa kalihukan kay mahimo ra man sila nga mo Log-on sa www.iec2016.ph.

Apil nga giawhag ni Tan nga moparehistro og sayo mao ang mga sakop sa media ug dili na unta mopaabot sa Enero 6, sunod tuig nga maoy katapusan nga pagpanawat sa rehistrasyon. (BANAT NEWS)