Bag-ong DILG Sec. Miawhag sa PNP nga mag-neutral

CEBU, Philippines - Ang bag-ong secretary sa Department of the Interior and Local Government (DILG) nga si kanhi kongresista Mel Senen miawhag sa kapolisan nga magpabilin sila nga neutral og labanan nga kandidato atol sa kampanya sa eleksyon sunod tuig.

Si Sarmiento, secretary general sa Partido Liberal, misaad sa pagpadayon sa mga maayo nga proyekto sa iyang gipulihan nga si Mar Roxas.

Kongresista sa Western Samar si Sarmiento apan dinhi sa Sugbo mitungha sa iyang high school ug koliheyo. Siya maoy gipili ni Presidente Aquino nga mopuli kang Roxas.

Si Roxas mosugod na sa pagsuroy-suroy sa mga dapit sa nasud alang sa iyang pagpapili pagka presidente.

Matud ni Sarmiento nga usa ka oportunidad ang paghatag kaniya’g higayon nga mapadayon ang pagpatuman og kausaban nga dili mahitabo sulod lang sa usa ka adlaw, kun dili kinahanglan gayud og hataas nga panahon.

Sumala pa ni Sarmiento nga lihokon dayon niya ang mga training module alang sa mga bag-ong matudlo nga opisyal human sa eleksyon sa tuig 2016 aron adunay hiniusa nga padulngan ang nasud tungod kay lisud kaayo og dili "orchestrated, kay hinay ang tubo sa nasud".

Si Sarmiento mapasigarbohon nga siya ang napili nga mohulip ni Roxas kay usa siya ka bisaya.

Matud ni Sarmiento nga mobalik usa siya sa Kongreso aron motrabaho ug manamilit kang House Speaker Feliciano Belmonte ug kaubanan kay mobalhin na siya og laing katungdanan sa kagamhanan.

Sa wala pa si Sarmiento mahimo nga kongresista, napili siya nga mayor sa Calbayog sulod sa tulo ka termino. (BANAT NEWS)