“Asset” sa ISAFP gidakop sa CIDG-7

CEBU, Philippines - Usa ka lalaking nangangkong confidential agent sa Intelligence Service of the Armed Forces of the Philippines ( ISAFP) ug duha ka mga kaubanan ang gidakop sa mga sakop sa Criminal Investigation and Detection Group 7 tungod sa paghupot og usa ka sub-machine pistol ug duha ka kalibre .45 pistola kagahapon diha sa Brgy. Cantipla, Cebu City.

Ang gidakop mao sila si Leonardo Lumukso, kinsa nakuhaan og .9mm submachine pistol, ug si Reneboy Gapitan Sr. ug ang 17-anyos niining anak nakuhaan tagsa og .45 caliber pistols.

Matud pa ni Superintendent Marlon Tayaba, ang hepe sa CIDG7, niresponde ang iyang mga operatiba sa lugar human dunay nitawag kanila bahin sa mga armadong lalaki sa maong barangay.Matud pang Tayaba ilaha karong subayon ang mga background sa tulo ilabi na nga tag-as nga kalibre sa armas ang nasakmit gikan kanila.

Si Lumukso dihang gikahinabi sa mga tigbalita nangangkon nga niadto sila sa lugar aron pagsusi sa report kabahin sa mga armadong mga tawo nga nasigpatan sa maong dapit.

Matud pa niya, kaabag sila sa gobiyerno paghatag og impormasyon kabahin sa mga kriminal ug naghimo sila niadtong tungora og “surveillance and casing operation” sa mga bukirang bahin sa Balamban ug Cebu City.

Midugang siya nga legal ang iyang pagdala sa maong armas tungod kay sakop siya sa Domestic Intelligence Force sa ISAFP, dihang gisusi iyang mission order sa ISAFP ni-expire na kini niadtong Agosto 31, 2015, apan matud niya naka-renew na siya niini apan gipaabot pa niyang mogawas ang bag-ong MO.

Si Gapitan Sr. miangkong wala silay lisensya pagdala sa iyang anak og armas, apan matud niya pangproteksyon lang nila kini ug gidala lang sila ni Lumukso aron pagsubay bahin sa mga armadong tawo sa maong dapit. (BANAT NEWS)