Nangawat sa Simala nakulatahan
CEBU, Philippines - Nakulatahan sa mga tawo ug natanggong sa selda sa Sibonga Police Station ang usa ka 22 anyos nga lalaki human gipasanginlang nikawat sa kinitaan sa usa ka tindahan diha sa Brgy. Lindogon sa nakalabay nga hapon.
Ang dinakpan naila nga si Angen Terogo, taga Brgy. Cogon, dakbayan sa Carcar, samtang ang tag-iya sa tindahan mao si Vidal Rabanes, 65.
Sumala pa ni Police Officer 1 Ronnie Cui ang desk officer sa Sibonga Police daghang mga deboto sa simbahan sa Simala nianang adlaw tungod sa adlaw nga natawhan sa Birheng Maria.
Apan samtang nagdasok ang mga tawo, gikatahong sekretong gikuha sa suspek ang usa ka box nga dunay sulod nga P45,000 nga halin sa tindahan ni Rabanes apan ang tupad niini nga tindera nakabantay ug nangayo og tabang sa mga tawo. Sulay pa unta nga midagan ang suspetsado apan nadakpan sa mga tawo hangtod nakulatahan.
Sigun pa ni Cui duna silay nadawat nga impormasyong bag-o pa lang nakagawas sa Cebu Provincial Detention and Rehabilitation Center (CPDRC) ang suspek sa wala pa matinong kaso. (BANAT NEWS)
- Latest
