Gikabit sa amigo

CEBU, Philippines - Parehong naghinol karon sa rehas sa prisohan ang usa ka ginang ug ang iyang kabit nga amigo ra usab sa iyang bana human silang duha nasakpan nga nagdulog ug walay mga sapot diha mismo sa balay sa magtiayon diha sa Brgy. Lamesa sa Balamban.

Ang nagpadakop kanila mao ang 32 anyos nga bana kinsa giingong dugay nang nakadawat og mga tabitabi bahin sa iyang asawa nga dunay kabit ug sa ilaha pang balay gihimo ang krimen, apan wala magdahom nga iyang higala maoy motukob sa iyang asawa.

Ang asawa nagpangidaron pa lang og 26 anyos  walay trabaho ug ang lalaki nag-edad og 23 anyos nga taga Brgy. Hingatmonan sa mao gihapong lungsod nga drayber.

Ang bana nga nahinabi sa Banat News sa telepono miingon nga makapasaylo ra kini sa gibuhat sa iyang asawa apan dili niya isibog ang kaso batok sa duha bisan og siyam ka tuig pa silang kasal niini.

Sumala pa sa bana nga halos duha ka bulan na kini nga nasayod nga duna’y laing lalaki ang iyang asawa apan iya lang giutong kay dili niya gustong mabungkag ang iyang pamilya kay duna silay duha ka gagmay pa nga anak nga nag edad og otso ug kwatro anyos.

Duha ka bulan na nga wala nag-ulian sa balay ang bana kay sigehan siya og away sa iyang asawa ug gusto sa babaye nga maglagyo una sila sud pipila ka bulan.

Apan niadtong nakalabay nga gabie usa ka text ang nadawat sa bana nga nagpahibalo kaniya nga atoa sa ilang balay ang lalaki sa iyang asawa maong nipauli kini kauban iyang igsuon ug mga polis.

Pugos nga giguba sa bana ang pultahan ug sa ilang pag-abli sa lawak ilang nakita ang iyang asawa ug ang iyang amigo nga nagdulog nga pulos hubo ang lawas.

“Mura ko og nakalitan, amigo pa gyud nako diay ang lalaki, wala gyuy mga sinina ang duha,” saysay pa sa bana.

Daling giposasan ang duha ug gitanggong sa selda sa Balamban Police.

Si Police Officer 3 Roy Olasiman sa Balamban Police nga nahinabi sa Banat News midayeg sa bana nga wala maghunahuna og dautan sa duha. (BANAT NEWS)