Nag-ilogay sa bata, lalaki nisukol sa polis

CEBU, Philippines – Nagtingkagol sa prisohan ang usa ka lalaki nga nanumbag og polis sa barangay Tubod-Bitoon, lungsod sa Dumanjug human nga gi-alarma sa iya’ng kapuyo pasado alas 12 sa nakalabay nga udto.

Ang suspek giila nga si Victor Tuto, 37, nagpuyo sa mao’ng dapit.

Matud ni Police Officer 2 Ronilo Quirante, desk officer sa Dumanjug Police Station, nga una’ng nagpakitabang sa ila’ng buhatan ang kapuyo nga si Carmel Joy Bayarcal, 21, kay gusto niya nga kuhaon ang iya’ng duha ka tuig nga anak nga gikostudiya ni Tuto.

Sila si PO3 Irish Buena sa Women and Children Protection Desk, uban nila ni PO2 Danny Camero ug PO1 Dave John Faunillan niadto sa lugar.

Human sa pipila ka minutos nga negosasyon nga gihimo ni Buena, nisugot ang suspek apan diha’ng gigunitan na sa inahan ang bata kalit lang gigunitan sa suspek ug nagbinirahay sa bata.

Gibadlong ni Camero ang suspek apan gisingkahan hinuon sila nga dili magbuot kay iya’ng anak dayun tukmod sa polis.

Si Faunillan nga nakakita sa hitabo ang dali nga niduol ug nitabang ni Camero apan kini ang giatake sa suspek ug gisukmag apan abtik nga nakalihay.

Sa kalagot sa suspek giingnan pa ang mga polis nga buang.

Didto na nakahukom ang mga polis nga dakpon ang suspek apan sa diha’ng pusasan na unta nisukol kini ug nahitabo ang dinumogay.

Si Quirante niingon nga gumikan kay daku’ng tawo si Tuto ug medyo gagmay og lawas ang duha ka polis hinungdan nga naglisud ang duha ka polis sa paglinayugay apan hingpit ra nga napusasan.

Dugang ni Quirante nga human nila gitanggong sa prisohan si Tuto, ang kapuyo ang nakig-settle ra sab sa suspek ug dili na mopasaka og kaso.

Apan tanggong gihapon sa prisohan ang suspek human nga porsigido sab nga mopasaka og kaso ang duha ka polis nga giatake niini.

Kaso’ng direct assault of person in authority ang ipasaka sa kapolisan batok ni Tuto. – /GMR) (BANAT NEWS)